Վանաձորի Խնձորուտ թաղամասն արդեն մանկական խաղահրապարակ ունի: Այն կառուցվել է հոլանդական «Բեկոր» բարեգործական ՀԿ-ի ներդրումներով և «Հոլանդ-Արմենիա» կազմակերպության ֆինանսական աջակցությամբ: Խաղահրապարակի դիմաց «Հոլանդ-Արմենիա» կազմակերպության նախագահ Աշոտ Վարդանյանի նախաձեռնությամբ նաև հուշաղբյուր է կառուցվել: Այն նվիրել է բոլոր ծնողներին: Բացման հանդիսավոր արարողությանը ներա էին նախաձեռնության հեղինակը, Վանաձորի քաղաքապետը, քաղաքապետի առաջին տեղակալը, կրթության, մշակույթի և երիտասարդության հարցերի բաժնի պետը, թաղամասի բազմաթիվ բնակիչներ: Բացման խոսքով հանդես եկավ քաղաքապետի առաջին տեղակալ Արտյոմ Գրիգորյանը: «Հոլանդ-Արմենիա» կազմակերպության նախագահ Աշոտ Վարդանյանը Վանաձորի քաղաքապետ Մամիկոն Ասլանյանի, Վանաձոր համայնքի ավագանու կողմից, ի նշան երախտիքի,պարգևատրվեց շնորհակալագրով: «Բեկոր» կազմակերպությունը զբաղվում է խաղահրապարակների կառուցմամբ , դպրոցներին և նախակրթարաններին տրամադրում է մարզական գույք և այլ բնույթի աջակցություն: Հոլանդական կազմակերպության կողմից Վանաձորում խաղահրապարակ կառուցելու խնդրանքով դիմել է «Հոլանդ-Արմենիա» կազմակերպության նախագահը: « Ես մեծացել եմ այս թաղամասում: Երեխաները խաղալու, զբաղվելու ոչ մի հնարավորություն չեն ունեցել»,-անկեղծանում է Աշոտ Վարդանյանը: Վանաձորի ծայրամասային թաղամասերում փոքրիկների համար խաղահրապարակների կառուցումն աշխուժություն է մտցնում:Շնորհիվ բարերարների՝ թաղամասի փոքրիկներն արդեն հաճելի զբաղմունք ունեն:
