Վանաձոր համայնքի ղեկավարի պաշտոնակատար Վանիկ Օհանյանը շնորհավորական ուղերձ է հղել  Գյումրի համայնքի նորընտիր ղեկավար Վարդգես Սամսոնյանին, որում ասված է. «Հարգելի պարոն Վարդգես Սամսոնյան,վանաձորցիների և անձամբ  իմ անունից  սրտանց շնորհավորում եմ  Ձեզ  և գյումրեցիներին համայնքի ղեկավար ընտրվելու կապակցությամբ:  Թող Ձեր ղեկավարմամբ հանրապետության երկրորդ քաղաքն ապրի իր շենացման և բարգավաճման մի նոր շրջափուլ:

Վստահ եմ, որ առաջիկա հինգ տարիները կլինեն քաղաքի զարգացման ու բարգավաճման տարիներ և համայնքային կառավարման Ձեր նախկին փորձառությունը վստահություն է ներշնչելու գյումրեցիներին, որ քաղաքի ապագան գտնվում է արհեստավարժ ղեկավարի  և նույնքան արհեստավարժ աշխատակազմի ձեռքերում:

Շնորհավորական խոսք եմ ուզում հղել նաև Գյումրի համայնքի ավագանու անդամներին համայնքի ղեկավար ընտրելու կապակցությամբ՝ մաղթելով  արգասաբեր և փոխհամագործակցված աշխատանք համայնքի ղեկավարության հետ՝  ի շահ քաղաքացիների:

Վստահ եմ, որ շարունակվելու և զարգանալու է  արդեն ավանդույթ դարձած Գյումրի-Վանաձոր համայնքային համագործակցությունը տարբեր ոլորտներում՝ մշակույթ, սպորտ, փառատոններ և այլն:

Գյումրի-Վանաձոր համայնքային   համագործակցությունն ունի նաև ապագային միտված գործնական բաղադրիչ, այն է ՝ Եվրամիության կողմից ֆինանսավորվող «ԴԱՇԻՆՔ՝ հանուն կայուն և կանաչ կառավարման» ծրագիրը, որի արդյունքում երկու  քաղաքները կունենան գերժամանակակից տրանսպորտային հաղորդակցություն և  արդյունավետ կառավարման համակարգ:

Օգտվելով առիթից` մաղթում եմ Ձեզ քաջառողջություն, բարեկեցություն բոլոր գյումրեցիներին և ամենայն հաջողություն՝  Ձեր պատասխանատու  գործունեության մեջ»:

ՎԱՆԻԿ  ՕՀԱՆՅԱՆ