Հարգելի՛ ուսուցիչներ,
Սրտանց շնորհավորում են ձեզ ձեր մասնագիտական տոնի կապակցությամբ:
Հայը դարեր շարունակ ակնածանքով և մեծարանքով է գնահատել մանկավարժի աշխատանքը՝ նրան վերապահելով նոր սերնդի կրթության և քաղաքացու ձևավորման դժվարին գործը: Ձեր աշխատանքից է կախված մեր վաղվա օրը: Յուրաքանչյուր երեխայի գիտակցական կյանքը հենց ձեզանով է սկսվում, և ձեր վաստակն անուրանալի է մեր ապագա քաղաքացիների կրթության ու դաստիարակության գործում: Դուք ստանձնել եք մատաղ սերնդի մեջ հայրենասիրություն, նվիրում և գիտելիք սերմանելու բարձր պարտականություն: Ձեր այսօրվա աշակերտները մեր վաղվա քաղաքացիներն են, ովքեր վաղը կերտելու են մեր երկրի պատմությունը` դառնալով նրա զինվորը, մտավորականը, գիտնականը, աշխատավորն ու մշակը: Գնահատում և հպարտանում ենք ձեր աշխատանքով:
Եվս մեկ անգամ ջերմորեն շնորհավորում եմ ձեզ Ուսուցչի օրվա կապակցությամբ, մաղթում երջանկություն, քաջառողջություն, արգասաբեր աշխատանք և նորանոր հաջողություններ մատաղ սերնդին կրթելու մեծ, դժվարին և պատասխանատու գործում:
