Այսօր ՝ մայիսի 8-ին, Գուգարաց թեմի առաջնորդարանի բակում տեղադրված Շուշիի ազատագրմանը նվիրված խաչքարի մոտ նշվեց Շուշիի ազատագրման և Երկրապահի օրը: Գուգարաց թեմի հոգևոր հովիվ տեր Վահան քահանա Ազարյանի ձեռամբ կատարվեց հոգեհանգստի կարգ` ի հիշատակ Արցախյան պատերազմում զոհված հերոս հայորդիների: Միջոցառմանը ներկա էին Լոռու մարզպետ Արամ Խաչատրյանը,Վանաձորի համայնքապետարանի աշխատակազմի քարտուղարի ժամանակավոր պաշտոնակատար Դավիթ Հակոբյանը, համայնքապետարանի և մարզպետարանի աշխատակիցներ, Երկրապահ կամավորականների միության անդամներ, Ռազմական ոստիկանության ներկայացուցիչներ: Ներկաները ծաղիկներ ու ծաղկեպսակներ խոնարհեցին եկեղեցու բակում տեղադրված Շուշիի ազատագրմանը նվիրված խաչքարին, ապա այցելեցին և ծաղիկներ խոնարհեցին նաև ՀՀ Արցախի հերոս, Սպարապետ Վազգեն Սարգսյանի հուշարձանին: Հաջորդ կանգառը ազատամարտիկների պանթեոնում էր, որտեղ ևս կատարվեց հոգեհանգստի կարգ և հնչեց աղոթք, ապա ներկաները հարգանքի տուրք մատուցեցին նահատակների շիրիմներին և ուղևորվեցին արցախյան 44-օրյա պատերազմի նահատակ հերոսների պանթեոն։