Այսօր՝ հոկտեմբերի 21-ին, Վանաձոր համայնքի ղեկավարի ժամանակավոր պաշտոնակատար Վանիկ Օհանյանը, Ճարտարապետության և քաղաքաշինության բաժնի պետ Սուրեն Աբովյանը, Կոմունալ տնտեսության, բարեկարգման և շրջակա միջավայրի պահպանության բաժնի պետ Կարեն Պառավյանը և ոլորտի մի խումբ պատասխանատուներ շրջայց կատարեցին 2021 թ․ սուբվենցիոն ծրագրերով իրականացվող աշխատանքների շինհրապարակներում, տեղում ծանոթացան ծրագրերի ընթացքին։
«Վանաձոր համայնքի Աղայան փողոցի հիմնանորոգում» ծրագրի ընթացքը մտնում է գործնական փուլ։ Ավարտական փուլում են մայթերի եզրաքարերի փոխարինման աշխատանքները։ Մեկնարկել են երթևեկելի գոտու կառուցման աշխատանքները։
Համայնքի ղեկավարի ժամանակավոր պաշտոնակատարը եղավ նաև «Վանաձոր համայնքի նոր պանթեոն և թիվ 2 գերեզմանատուն գնացող փողոցի հիմնանորոգում» ծրագրի շրջանակում իրականացվող աշխատանքների շինհրապարակում։ Այստեղ պատրաստվել է ասֆալտի նախաշերտը, կառուցվել են ջրահեռացման առուներ (վաքեր), ճանապարհն արդեն մասամբ ասֆալտապատվել է։ Այն մեկ ամսից կհանձնվի շահագործման։
Հիշեցնենք, որ պետություն-համայնք համաֆինանսավորմամբ իրականացվող սուբվենցիոն ծրագրերով հիմնանորոգվում է նաև Սայաթ-Նովայի անվան զբոսայգին, որի աշխատանքները մոտենում են վերջնական փուլին։ Ճեմուղիների եզրաքարերն ամբողջությամբ շարված են, ավարտվել են բացօթյա ամֆիթատրոնի կառուցման աշխատանքները, պատրաստվում է ասֆալտի նախաշերտը, շուտով կսկսվեն ասֆալտապատման և սալիկապատման աշխատանքները։ Լուսավորության համակարգի մալուխների միացումները ևս տրված են, արդիականացված են ջրահեռացման և ջրամատակարարման համակարգերը։
«Վանաձոր համայնքի թիվ 8 մանկապարտեզի շենքի կառուցում» ծրագրի աշխատանքները ևս ընթացքում են։ Այստեղ արդեն իսկ ամբողջությամբ քանդվել են տարածքում առկա տնակները։ Մինչև տարեվերջ պատրաստ կլինի շենքի հիմքը։ Կառուցապատման աշխատանքները կիրականացվեն հաջորդ տարի։
