Նոյեմբերի 10-ը Տեղական ինքնակառավարման մարմինների կազմավորման օրն է: Այդ կապակցությամբ Վանաձոր համայնքի ղեկավարի պաշտոնակատար Վանիկ Օհանյանը շնորհավորական ուղերձ է հղել, որում ասված է.
«Հարգելի՛ գործընկերներ` բոլոր տարիների ավագանու անդամներ, համայնքապետարանների աշխատակազմերի և համայնքային ենթակայության կազմակերպությունների աշխատակիցներ,
Ջերմորեն շնորհավորում եմ Ձեզ, տեղական ինքնակառավարման մարմինների կազմավորման 25-ամյակի առթիվ:
Տեղական ինքնակառավարման մարմինների կազմավորման օրը, ժամանակային առումով ,այս տարի համընկավ Վանաձոր, Գուգարք , Դարպաս և Շահումյան համայնքներում ավագանու համամասնական ընտրությունների անցկացման գործընթացի հետ, ինչը նշանակում է, որ Վանաձոր համայնքը մոտ ապագայում ունենալու է ընդլայնված ֆինանսական հնարավորություններ, նաև մեծ պատասխանատվությամբ գործող տեղական ինքնակառավարման մարմիններ:
Տեղական ինքնակառավարման մարմինների ներկայացուցիչների աշխատանքից է մեծապես կախված մարդկանց կյանքի որակը համայնքներում, աշխատանք, որը արհեստավարժությունից, կազմակերպչական ունակությունից բացի, պահանջում է նաեւ զուտ մարդկային որակներ` պատասխանատվությունից մինչեւ համբերատարություն, բարեվարքություն և պարկեշտություն:
Մեր քաղաքացիների արժանապատիվ կենսաձևի և ապագայի համար անհրաժեշտ է համայնքային մարմիններում ծառայություն մատուցողների ու քաղաքացիների համատեղ ու համերաշխ աշխատանք` հիմնված փոխօգնության ու փոխվստահության վրա:
Վստահ եմ, որ նոր ձևավորվող Վանաձոր համայնքը , համայնքապետարանի աշխատակազմը և աշխատակիցներն իրենց պատասխանատու աշխատանքով շարունակելու են վստահորեն կատարել իրենց առջև դրված խնդիրները՝ հանուն համայնքի բնակիչների բարեկեցության և հետագա առաջընթացի:
Օգտվելով առիթից , ուզում եմ կոչ անել մեր համաքաղաքացիներին ակտիվ մասնակցություն ունենալ համայնքի ապագայի համար կարևոր դերակատարում ունեցող որոշումների կայացմանը , հանրային քննարկումներին, ինչի համար կա անհրաժեշտ իրավական հիմք և գործիքակազմ:
Եւս մեկ անգամ շնորհավորելով ՏԻՄ աշխատակիցներին` մաղթում եմ հաջողություն, նպատակասլացություն և հաստատակամություն իրենց բարդ ու պատասխանատու աշխատանքում:»
