Թանգարանների սիրելի աշխատակիցներ,
Շնորհավորում եմ ձեզ մասնագիտական տոնի՝ Թանգարանների օրվա առթիվ։
Այս օրը ևս մեկ առիթ է երախտագիտություն արտահայտելու թանգարանների աշխատակիցներին, որոնց աշխատանքը անցյալի ու ներկայի խաչմերուկում է գտնվում։
Դուք ժամանակի պահապաններն եք։ Դուք ապահովում եք հոգևոր կապը ժամանակների և նոր սերունդների միջև։ Ձեր շնորհիվ մենք հնարավորություն ունենք տեսնելու արվեստի, մշակույթի, գիտության, պատմության եզակի նմուշներ, և դրանց միջոցով առնչվելու պատմության ընթացքին։ Նաև այդպես է ձևավորվում աշխարհայացքն ու գեղագիտական ճաշակը։
Շնորհակալ եմ ձեզ բարեխիղճ աշխատանքի, աշխատասիրության և այս գործին անսահման նվիրվածության համար։
Շնորհավորում եմ, մաղթում եմ ստեղծագործական նոր հաջողություններ, ոգեշնչում և այցելուների մեծ հոսք:
