Ի պատասխան սոցիալական ցանցերում և վանաձորցիների շրջանում տարածված խոսակցությունների, թե «Սայաթ Նովայի» անվան զբոսայգում տեղի են ունենում ապօրինի ծառահատումներ, Վանաձորի քաղաքապետարանը ներկայացնում է այգու այն ծառերի լուսանկարները, որոնց մի մասը հատվել է, մի մասն էլ հատվելու է առաջիկայում:
Նշենք, որ հատման և էտման թույլտվություն տրվել է «Սայաթ Նովայի» անվան այգու ծառերի գարնանային սանիտարական էտման համար ստեղծված հանձնաժողովի հիման վրա՝ Վանաձորի քաղաքապետ Սամվել Դարբինյանի 02 Ապրիլ 2015թ-ի N 110-Ա որոշման հիման վրա:Հանձնաժողովի կազմում են քաղաքապետարանի աշխատակազմի ճարտարապետության և քաղաքաշինության բաժնի պետ Տիգրան Պապանյանը, «Նեցուկ» «ՀԶՀ» ՀՈԱԿ-ի տնօրեն Հայկ Համբարձումյանը, ՀՀ Բնապահպանության նախարարության աշխատակազմի բնապահպանական պետական տեսչության Լոռու մարզային բաժնի ավագ պետական տեսուչ Արմեն Հարությունյանը: Հանձնաժողովի ղեկավարն է փոխքաղաքապետ Նորիկ Սարդարյանը: Հատման եզրակացությունը տրվել է ելնելով ծառերի չորացած և հիվանդ լինելուց, որոնք վտանգ էին ներկայացնում ինչպես տարածքում զբոսնող քաղաքացիների, այնպես էլ մյուս բուսատեսակների համար:
Վանաձորի քաղաքապետարանը որոշ մարդկանց կոչ է անում ամպագոռգոռ հայտարարություններ անելուց առաջ ծանոթանալ իրավիճակին, ուսումնասիրել մասնագետների կողմից տրված եզրակացությունները, հետո նոր միայն տարբեր հարթակներում ելույթներ ունենալ՝ մեղադրանքներ շռայլելով:Թեպետ վստահ ենք, որ հայտարարություններ անողներից շատերը լավ էլ տեղյակ են ինչպես իրավիճակից, այնպես էլ ծառերի վտանգավորության աստիճանից:
Վանաձորի քաղաքապետարան