Վանաձոր համայնքի ղեկավարի պաշտոնակատար Արկադի Փելեշյանը հյուրընկալեց Վանաձորի ավագ և միջնակարգ դպրոցների աշակերտական խորհուրդների ներկայացուցիչներին։
Համայնքի ղեկավարը դպրոցականներին դեռ նախորդ տարվա ավարտին խոստացել էր աշխատանքային նոր տարվա առաջին հանդիպումը անցկացնել նրանց հետ՝ քննարկելու դպրոցականների առաջարկը։
Արկադի Փելեշյանը պատրաստակամություն էր հայտնել աջակցելու համայնքի ղեկավարին կից երիտասարդական խորհուրդ ստեղծելու երիտասարդների ցանկությանը։Հանդիպմանը ներկա էին Վանաձորի Էվրիկա, թիվ 5, թիվ 17 դպրոցների ներկայացուցիչները։
Համայնքի ղեկավարը կրկին շեշտեց, որ կարևորում է երիտասարդների ակտիվ մասնակցությունը համայնքի կյանքում։ Արկադի Փելեշյանը հույս հայտնեց, որ երիտասարդներն իրենց նախաձեռնություններով ակտիվ կլինեն և Վանաձորում հանրային կյանքի տարբեր բնագավառներում կհարստացնեն և նոր օրակարգ կձևավորեն։Արկադի Փելեշյանը խոստացավ աջակցել երիտասարդներին իրենց գաղափարները հասցեավորված ու նպատակային իրականացնելու։Քննարկվեց խորհրդի ձևավորման համար կարգ մշակել։ Համայնքի ղեկավարը նշեց, որ պետք է աշխատել հնարավորինս բաց և հասանելի բոլոր ցանկացողների համար, ուշադրություն դարձնել ընդգրկելու ոչ միային դպրոցների ու ուսումնական հաստատությունների ներկայացուցիչներին, այլ նաև ներգրավել հասարակական կազմակերպությունների, քաղաքացիական նախաձեռնությունների և անհատների։ Առաջիկայում համայնքի ղեկավարը հանդիպում կանցկացնի ուսանողական խորհուրդների ներկայացուցիչների հետ, ապա կհրավիրի ընդլայնված կազմով քննարկման։
