Տեսանյութում քաղակտիվիստ Գևորգ Քոթանջյանը պնդում է, որ փողոցների նորոգման համար տրվող գումարներին համարժեք վերանորոգման աշխատանքներ Վանաձորում չեն իրականացվել: Վերջինս նշում է, որ Չուխաջյան փողոցում 2015թ.-ի աշնան ամիսներին սկսվել են շինարարական աշխատանքներ, որոնք ձյան գալու պառճառով դեկտեմբեր ամսին չշարունակվեցին: Հաջորդ տարի նորից գումար դուրս գրվեց, և սկսեցին աշխատանքներն իրականացնել: Արդյունքում փակվեցին այն բոլոր փոսերը, որոնք նախորդ տարի արվել էին:
Տեղեկացնում ենք, որ 2015-2016թթ. Վանաձոր համայնքում իրականացված փողոցների վերանորոգման և հիմնանորոգման աշխատանքների բոլոր աշխատանքների վերաբերյալ փաստաթղթերն առկա են Վանաձորի համայնքապետարանում և անհրաժեշտության դեպքում կարող ենք տրամադրել: Հարկ է նշել, որ 1 մ2 վերանորոգման և հիմնանորոգման աշխատանքների գումարային տարբերությունը պայմանավորված է կատարվող աշխատանքի ծավալից և մրցույթում շահող կազմակերպությունների կողմից ներկայացված գնային առաջարկներից:
Այնուհետև տեսանյութում նշվում է, որ Վանաձորում ասֆալտապատված փողոցներից ուշագրավ է Շիրակացի փողոցը, որտեղ, ըստ Գ. Քոթանջյանի, 2018թ.-ին գրեթե շինարարական աշխատանքներ չեն իրականացվել, մի քանի փոս է փակվել, արդյունքում չկա որևիցե աշխատանք:
Նշենք, որ վերը նշվածը բացարձակապես չի համապատասխանում իրականությանը, քանի որ Կառավարության 23.06.2017 թ.-ի թիվ 720-Ն և 24.08.2017թ. թիվ 1047-Ն որոշմամբ Կառավարության հրատապ ծրագրով Լոռու մարզպետարանին է հատկացվել 300 մլն ՀՀ դրամ` Վանաձոր համայնքի փողոցների վերանորոգման համար: Մրցույթի արդյունքում կազմակերպությունների կողմից առաջարկվող գինը կազմել է 203 մլն դրամ: Արդյունքում վերանորոգվել են Վարդանանց, Զ. Անդրանիկի, Հալաբյան, Աղայան, Ուսանողական, Շինարարների, Մյասնիկյան, Նժդեհի, Շիրակացու, Թումանյան, Ներսիսյան, Զորյան, Տավրոսի 6-րդ, Դեմիրճյան փողոցները, Երևանյան խճուղին: Հարկ է նշել, որ Շիրակացի փողոցը` Տիգրան Մեծի խաչմերուկից մինչև Կարեն Դեմիրճյան խաչմերուկ, ամբողջությամբ հիմնանորոգվել է: Հիմնանորոգված բոլոր փողոցների համար սահմանվել է 3 տարի ետերաշխիքային սպասարկման ժամկետ:
Տեսանյութում նշվում է նաև, որ Շիրակացի փողոցը կրկին հայտնվել է վերանորոգվող փողոցների ցանկում, ինչը, ըստ ակտիվիստ Գևորգ Քոթանջյանի խոսքի, շատ կասկածելի է: Փողոցի երկայնքով տարբեր հատվածներում ասֆալտի ծածկույթը կտրել, քերելը պատահական չէ, և քաղաքային իշխանություններն անցյալ տարի նախատեսված ու չարված աշխատանքների հետքերն են փորձում կորցնել:
Նշենք, որ Շիրակացի փողոցի` տեսանյութում ցուցադրված հատվածում, որտեղ աժմ կառավարության և Վանաձորի համայնքապետարանի համատեղ «Փողոցների կապիտալ նորոգում» սուբվենցիոն ծրագրով իրականացվում են հիմնանորոգման աշխատանքներ, 2017թ.-ին վերանորոգման որևէ աշխատանքներ չեն իրականացվել:
Տեսանյութում նշվում է նաև, որ բավականին անմխիթար վիճակում է գտնվում Լանջային փողոցը, որտեղ համայնքապետարանի կողմից որևիցե աշխատանքներ չեն իրականացվել:
Նշենք, որ 2017թ. բյուջեով նախատեսված գումարները չեն բավարարել Լանջային փողոցի ասֆալտապատման համար և այնտեղ 2018թ. իրականցվել են հողային հարթեցման և խճալցման աշխատանքներ, ինչպես նաև համայնքային բյուջեի միջոցներով իրականացվել են ջրահեռացման համակարգի շինարարական աշխատանքներ:
Տեսանյութում նշվում է նաև, որ վանաձորցի մի խումբ վարորդներ, դժգոհելով փողոցների վիճակից, որոշել էին բողոքի երթ անցկացնել, սակայն գործը բողոքի գործողություններին չհասավ: Մամիկոն Ասլանյանը, տեղեկանալով երթի մասին, հաջորդ օրը հանդիպեց նրանց հետ, ապա և գրառում կատարեց «Ֆեյսբուք»-ի իր էջում` նշելով, որ մինչև 2018 թ. սեպտեմբերի վերջ կհիմնանորոգվեն տասնյակ փողոցներ`Չերկասի, Մաշտոցի, Սասունցիների փողոցները և Շինարարների-Իսահակյան-Ներսիսյան փողոցները միացնող հատվածը, Վերածննդի, Փարաջանովի, Մալաթիայի, Լազյան, Մոսկովյան և Շիրակացի փողոցները:
Տեղեկացնենք, որ այժմ նշված փողոցների հիմնանորոգման աշխատանքներն ընթացքի մեջ են և ըստ պայմանագրի, պետք է ավարտվեն մինչև 2018թ. հոկտեմբերի 12-ը:
