- Վանաձորի Համայնքապետարանի Պաշտոնական Կայք - http://vanadzor.am -

Սերժ Սարգսյանի նվերը Վանաձորի պատվավոր քաղաքացու ստեղծագործությունն էր

Նախագահ Սերժ Սարգսյանը Մոսկվայի Մայր տաճարի պատկերասրահին նվիրեց Անատոլի Ավետյանի ստեղծագործությունը
Ռուսաստանի Դաշնությունում գտնվող Նախագահ Սերժ Սարգսյանը տիկնոջ հետ սեպտեմբերի 17-ին մասնակցել է Մոսկվայի Հայոց առաջնորդանիստ Սուրբ Պայծառակերպության եկեղեցու օծման և եկեղեցական համալիրի բացման արարողությանը:
Մայր Տաճարի օծման հանդիսավոր ծիսակատարությունը կատարել է Ն.Ս.Օ.Տ.Տ. Ամենայն Հայոց Կաթողիկոս Գարեգին Երկրորդը: Արարողությանը ներկա է եղել և իր օրհնությունն է բերել Մոսկվայի և Համայն Ռուսիո Պատրիարք Կիրիլը, ներկա են եղել նաև ԼՂՀ Նախագահ Բակո Սահակյանը, Ռուսաստանի պետական և հասարակական գործիչներ, Հայ Առաքելական եկեղեցու Հայաստանի և արտերկրի խոշորագույն թեմերի առաջնորդներ, Ռուսաստանի Դաշնության կրոնական հարանվանությունների առաջնորդներ, ներկայացուցիչներ և բարերարներ:
Մայր Տաճարի օծման հանդիսավոր արարողությունից հետո, Նախագահ Սերժ Սարգսյանը կազմակերպիչների, բարերարների և հյուրերի հետ միասին եկեղեցու վարչական շենքի նախասրահում դիտել է «Հայերը Մոսկվայում. պատմական ուղին» ցուցահանդեսը, որը կազմակերպել են Հայ Առաքելական եկեղեցու Ռուսաստանի և Նոր Նախիջևանի թեմը, Հայաստանի ազգային արխիվը, ՌԴ արխիվի դաշնային գործակալությունը, Մոսկվայի արխիվի գլխավոր վարչությունը և Մոսկվայի կենտրոնական պետական արխիվը:
Դիտման ընթացքում Նախագահ Սերժ Սարգսյանը Մայր տաճարի թանգարանին է նվիրել Վանաձորի պատվավոր քաղաքացի, ՀՀ վաստակավոր նկարիչ Անատոլի Ավետյանի Տիրամոր պատկերով ստեղծագործությունը: