- Վանաձորի Համայնքապետարանի Պաշտոնական Կայք - http://vanadzor.am -

Պաշտոնական այցով Բաթումիում էր Վանաձորի քաղաքապետ Սամվել Դարբինյանը

Բաթումիի քաղաքապետ Գեորգի Երմակովի հրավերով պաշտոնական այցով Բաթումիում էր Վանաձորի քաղաքապետ Սամվել Դարբինյանը, ով արդեն երրորդ անգամն էր մասնակցում Բաթումի քաղաքի օրվա տոնակատարությանը, որն այս տարի անց է կացվել «Բաթումին բարեկամության քաղաք է» խորագրով: Սամվել Դարբիյանը նախ ներկա է գտնվել նորընտիր քաղաքապետ Գեորգի Երմակովի ընդունելությանը Բաթումիի քաղաքապետարանում, որին մասնացել են նաև 9 պետությունների պատվիրակներ: Հանդիպման ընթացքում եւ շրջայցերի ժամանակ պատվիրակություններին ներկայացվել են ինչպես օտարերկրյա ներդրողների կողմից Բաթումիում արդեն իրականացված, այնպես էլ իրականացվելիք ծրագրերը տարբեր ոլորտներում:
Վրացական լրատվամիջոցներին տված հարցազրույցներում և հայ համայնքի ներկայացուցիչների հետ հանդիպման ժամանակ Սամվել Դարբինյանը բարձր է գնահատել Բաթումիում տարեց-տարի նկատվող դրական փոփոխությունները` ավելացնելով, որ քաղաքը դարձել է ավելի գրավիչ զբոսաշրջության եւ ներդրումների համար:
Գեորգի Երմակովը եւ Սամվել Դարբինյանը խոսել են Բաթումի եւ Վանաձոր քաղաքների միջեւ համագործակցության առավել նպատակահարմար տարբերակներ գտնելու եւ մշակելու մասին` հիմք ընդունելով ութամյա բարեկամության պայմանագիրը, և երկուստեք պատրաստակամություն են հայտնել աջակցել փոխադարձ նոր նախաձեռնություններին: Իր հերթին Վանաձորի քաղաքապետ Սամվել Դարբինյանը Բաթումիի իր գործընկերոջը, ինչպես նաեւ Աջարիայի հայ համայնքի պատվիրակությանը պաշտոնապես հրավիրել է ներկա գտնվել հոկտեմբերի 4-ին կայանալիք Վանաձորի քաղաքի օրվա տոնակատարությանը:

Վանաձոր և Բաթումի քաղաքների բարեկամությունը տասնյակ տարիների պատմություն ունի և դեռևս խորհրդային տարիների Կիրովական և Բաթումի քաղաքները հատուկ բարեկամական հարաբերություններ էին պահպանում: Հայաստանի և Վրաստանի անկախացումից հետո երկու քաղաքների ղեկավարները հավատարիմ մնացին ավանդույթներին և 2006 թ-ին երկու քաղաքների քաղաքապետները ստորագրեցին բարեկամության փաստաթուղթ և նախանշեցին համագործակցության ծրագրեր մշակույթի, զբոսաշրջության, սպորտի, կրթության ոլորտներում: Ութ տարիների ընթացքում բազմաթիվ փոխայացելություններ են եղել քաղաքը ներկայացնող պատվիրակություննների մակարդակով, համույթների և սպորտային թիմերի ներկայացմամբ: Ձևավորվել է նաև նոր և գեղեցիկ մի ավանդույթ, երբ երկու քաղաքների ղեկավարները պարտադիր մասնակցում են քաղաքային տոներին՝ «Վանաձորի օր» և «Բաթումոբա», որոնք բարեկամության և համագործակցության նոր հնարավորությունների յուրօրինակ հանդիսություններ են: