Գնահատելով մարզկենտրոն Վանաձորի ներհամայնքային ճանապարհների անմխիթար վիճակն ու քաղաքային բյուջեի սուղ հնարավորությունները՝ դեռևս անցած տարեվերջին Լոռու մարզպետ Արթուր Նալբանդյանը հանրապետության նախագահին էր դիմել ֆինանսական աջակցության խնդրանքով: Ընթացիկ տարեսկզբին հայտնի դարձավ, որ մարզի ղեկավարի խնդրանքը բավարարվել է, և նախագահի հանձնարարությամբ Վանաձորի ճանապարհների հիմնանորոգման նպատակով կառավարության պահուստային ֆոնդից կհատկացվի 300 մլն դրամ: Եվ ահա մայիսի 31-ին հանրապետության կառավարությունից տեղեկություն ստացվեց, որ նշյալ գումարը արդեն հասցեագրվել է մարզկենտրոնին:
Այս մասին Լոռու մարզպետարանում հրավիրված խորհրդակցությանը քաղաքի հասարակական տրանսպորտային երթուղիների ներկայացուցիչներին հայտնեց Լոռու մարզպետի տեղակալ Արսեն Դարբինյանը:
-Բացի կառավարության հատկացումից, այդ նպատակի համար 100 մլն դրամ ներդրում կարվի Վանաձորի բյուջեի, ևս 100 մլն դրամ՝ 2017 թվականին մարզին հատկացված հրատապ ծրագրային միջոցներից: Իհարկե, հասկանում ենք, որ նման գումարներով հնարավոր չէ հիմնավոր լուծում տալ տասնամյակներով կուտակված հիմնախնդրին, բայց գոնե որոշակիորեն կբարելավենք երթուղային սպասարկման ենթական հիմնական ճանապարհների վիճակը,-ասաց նա:
Ուղևորափոխադրող կազմակերպությունների ներկայացուցիչներն իրենց դժգոհությունն արտահայտեցին հատկապես Դեմիրճյան և Գր. Լուսավորիչ փողոցների խիստ անմխիթար վիճակի վերաբերյալ, մարզային իշխանություններից ակնկալելով հնարավորինս սեղմ ժամկետներում իրավիճակը բարելավելու գործողություններ:
Փոխմարզպետը ներկա գտնվողներին և երթուղային սպասարկում իրականացնող բոլոր կազմակերպություններին ու անհատ վարորդներին մարզի ղեկավարության անունից հորդորեց ներողամիտ լինել ստեղծված իրավիճակի համար, որն ավելի շատ պայմանավորված էր տևական անձրևներով և հավաստիացրեց, որ այսուհետև հնարավորը կարվի փողոցների բարեկարգման ձգձգումները բացառելու համար: